搜索
毛毛和大鬼廣播劇劇本旁：第一節一個姐姐嚟咗屋企爸爸媽媽坐飛機去咗美國，屋企就只係剩返婆婆、公公同埋毛毛。婆婆就同毛毛講喇……婆：你太百厭啦，我要搵個姐姐返嚟管下你先得。毛：公公夠百厭囉，點解無姐姐嚟管下佢呀？公：我邊度夠你百厭呀？我又無掟架飛機落街。毛：你有打電話喎！公：我打電話唔係百厭，你打電話先至係百厭啊！旁：因為毛毛聽到公公打電話嘅時候會問。公：豬先生喺度嘛？旁：之後都無人鬧過公公。但係毛毛一攞起電話問：狗仔喺度嘛？婆婆同公公就會一齊鬧佢。公&婆：你又百厭啦？唔准咁曳啊！旁：毛毛覺得咁樣真係太唔公平啦！最後，姐姐終於都嚟咗啦。毛毛一睇，原來姐姐係咁樣嘅，塊面肥嘟嘟、又曬到黑掹掹，成日都笑咪咪咁。姐姐就係專門嚟管住毛毛嘅，如果毛毛又曳曳，想將啲牛奶倒落地，姐姐就會笑笑口咁捉住佢隻手，然後話……姐：毛毛乖，毛毛唔好倒牛奶落地。旁：但係，如果婆婆同公公唔喺屋企嗰陣，姐姐唔再笑咪咪喇，仲會變到好惡好惡添呀。毛毛如果將個碗仔掟落地，姐姐就會碌大對眼鬧毛毛。姐：即刻執返起佢！唔執？信唔信我打你屁股嗱！旁：毛毛就唯有喺張椅上面爬落地，執返起個碗仔，心入面諗。毛：執咪執囉，我又唔係唔識執！旁：毛毛最鍾意就係去街街，但係姐姐就唔鍾意啦，佢話怕曬黑喎，所以每次佢都要等太陽落到去屋後面喇，先至會話。姐：行啦，毛毛，我哋去街街睇車車喇。旁：第二節姐姐話：「大鬼嚟啦！」毛毛睇完車車，就會去返花園仔，踢波啦、踩三輪車啦，真係好開心架！但係，玩咗無幾耐，天就黑啦，姐姐就會話……姐：好啦，返屋企啦。毛：唔返啊，我仲未玩夠啊。姐：你係咪唔聽話啊？信唔信我打你屁股呀。旁：唔想俾姐姐打屁股，就要返屋企。如果俾佢打呢，毛毛就會喊，喊一陣又可以踩多一陣三輪車，於是毛毛決定俾姐姐打屁股。毛：唔返屋企，唔返屋企！旁：姐姐就捉住毛毛，要佢趴喺三輪車上面。毛毛著住開（浪）褲，一趴底，就打出個屁股。姐姐就係咁打落毛毛個屁股度……毛（扮喊）：哇哇——姐：哼，得把聲，無眼淚嘅，咋喊?!毛（心想）：咦？點解姐姐唔係講：好啦，毛毛唔好喊啦，我哋踩多一陣啦。旁：於是毛毛就喊得更大聲。毛：哇哇哇——旁：姐姐擰轉頭望一望樓上，終於就話。姐：算啦算啦，俾你踩多一陣啦！乞鬼人憎！旁：毛毛即刻坐返上三輪車，喺花園仔度兜來兜去。姐：婆婆好似煮好飯啦喎，哇，條桂花魚煎得好香喎。毛：我仲要玩一陣，你自己返去食先啦。姐：哇，公公買返嚟嘅水蜜桃，咁大個喎。毛（心聲）：玩完先返屋企食都未遲啦，橫掂個水蜜桃無腳嘅，又唔會自己走咗去。旁：於是毛毛唔睬姐姐，繼續踩三輪車。姐姐見呢個辦法行唔通，諗咗一陣，又突然大聲嗌……姐：哇，大鬼嚟啦！旁：果然，毛毛即刻停低車，係咁週圍望。毛：大鬼？喺邊啊？姐：佢「呢」埋喺好黑好黑嘅地方度，你睇佢唔到架。毛：好黑嘅地方？大鬼乜嘢樣架？姐：哇，好得人驚架！佢黑掹掹，又高又大隻，啲頭髮又長又亂。個嘴仲好大添啊，專門食小朋友架。旁：毛毛聽到呢度，即刻跳落三輪車，跑過去攬住姐姐對腳，然後擰轉頭望住花園好黑嘅地方……毛：踩三輪車都唔好玩嘅，我哋返屋企啦。旁：第三節毛毛打電話畀狗仔今日，婆婆出咗去買餸，公公又去咗捉棋。姐姐喺房裡面，對住塊鏡搽唇膏。無人睇住毛毛，毛毛於是攞起電話……毛：喂，狗仔喺唔喺度啊？我係毛毛啊！狗：汪，你係毛毛？我係狗仔啊，汪！毛：狗仔，你喺屋企做緊乜啊？狗：我喺度玩緊啊，貓仔嚟咗我屋企，兔仔都嚟咗，你都快啲嚟啦。毛：好，我宜家就嚟！旁：毛毛放低電話，靜雞雞行出走廊，無姐姐拖住，落樓梯嗰陣就要自己小心扶住欄杆，如果唔係就會仆親，到時個頭起個大瘤，痛死人架。行到落街，無婆婆抱住，過馬路就一定要小心。（加入交通燈聲做背景聲）綠公仔著咗先至好過，（加入交通燈聲做背景聲）紅公仔著住嘅時候就一定要企定定。狗仔間屋係用木板搭嘅，屋頂尖尖咁，好靚架！毛毛一敲門（加敲門聲），狗仔、貓仔同兔仔就一齊跑出嚟，佢哋拖住毛毛隻手，一齊入屋玩。狗仔有好多好多玩具，佢哋一齊砌積木，玩車車，捉「e因」，乜都玩勻晒。旁：夜晚，公公返到屋企，毛毛就話俾公公聽。毛：狗仔屋企好好玩架，乜嘢都有。公：係咩？玩咗啲乜啊，快啲講俾我聽。旁：毛毛就講喇，佢點樣同狗仔、兔仔、貓仔一齊玩，但係公公好傻啊，一啲都聽唔明，仲問姐姐。公：毛毛講緊嘅，係咪小潔屋企隻狗仔呀？毛：唔係啊！狗仔自己一個住喺一間大屋度架，姐姐唔識佢架。旁：婆婆喺旁邊聽到，就好緊張咁問姐姐。婆：毛毛今日一個人落街嚟咩？姐：咪聽佢亂講啦。旁：毛毛心裡面諗。毛（心想）：嘻，姐姐淨係識得「呢」喺房度搽唇膏，梗係乜都唔知啦。旁：第四節毛毛打電話畀大鬼講下講下嘢，突然之間停電喎，成間屋變到黑媽媽。毛毛即刻跑過去攬實婆婆。婆婆就覺得好奇怪喇。婆：做乜啊？旁：毛毛搏命攬實婆婆，好驚咁話。毛：嗰度有隻大鬼啊，嗰度有隻大鬼啊。旁：連婆婆都俾佢搞到驚驚地。婆：你又亂講嘢啦！公：哈，毛毛話有大鬼？點解公公睇唔到架？毛：大鬼「呢」埋喺好黑好黑嘅地方，我哋睇唔到架。婆：係唔係公公你又嚇佢嚟啊？公：無啊。喂，毛毛，係邊個話你知有大鬼架？旁：毛毛啱啱想講嗰陣，姐姐就跑過嚟抱起毛毛，笑咪咪咁話。姐：毛毛，去沖涼囉，我哋點起蠟燭，好光就唔怕囉。旁：沖涼嗰陣，可以將毛巾放喺浴缸度做船仔，好好玩架，所以毛毛就好開心咁跟姐姐去沖涼啦。毛毛打出個屁股，企喺浴缸度，問姐姐攞毛巾嚟摺船仔。但係姐姐舉高條毛巾，細細聲同毛毛講。姐：公公如果再問，你就話，係小潔話你知有大鬼嘅，好唔好啊？毛：下，明明係姐姐講架。姐：咁我唔俾船仔你玩架啦。毛：嗯，係啦係啦，係小潔講架。姐：毛毛真係乖，啦——俾你。旁：毛毛一拎到條毛巾，就好開心咁講。毛：明明就係姐姐講大鬼架嘛。旁：姐姐即刻就哄個嘴埋去對準枝蠟燭。姐：好吖，我就吹熄枝蠟燭，週圍黑掹掹，到時大鬼就出嚟捉你走。毛：吖，唔好啊！毛毛唔曳啦！毛毛好乖架！旁：姐姐有大鬼幫手，仲惡過之前！毛毛心裡面諗。毛（心想）：點解大鬼淨係幫姐姐，唔嚟幫我呢？旁：毛毛真想好想問下大鬼啊。第二日，婆婆又去買餸，公公又去捉棋。姐姐著住條新裙，喺大鏡前面左照右照。毛毛就靜靜雞拎起電話。毛：喂，大鬼喺唔喺度啊？旁：點知，電話嗰邊真係有人講嘢，仲係一把好粗魯嘅聲。鬼：啊——嗚！我係大鬼，你係邊個？旁：哇，好得人驚啊，毛毛即刻丟低電話，跑入房話俾姐姐聽。毛：有大鬼啊！旁：姐姐望都唔望毛毛，淨係掛住喺塊鏡前面扭嚟扭去。姐：咪阻住晒啦，行開行開，自己去玩。旁：毛毛行出去，又見到個電話。心裡面諗。毛（心想）：不如再打一次啦，橫掂大鬼咁大隻，一定唔會喺電話度爬出嚟。公公以前都叫過好多次「豬先生」啦，都無見過「豬先生」喺電話度爬出嚟喎。旁：諗諗下，毛毛又好小心咁拎起電話。毛：喂，大鬼！旁：電話嗰度又傳嚟嗰把好粗魯嘅聲。鬼：啊—嗚！我係大鬼。你有無波板糖啊。完