搜索
1環境篇導言透過時代的真相，理解人類的往事，觀察文明的演進，了悟性命的滄桑佮歷史的智慧，證明著台南的地位佮風采。台灣俗諺有一句話講「一府、二鹿、三艋舺」，說明台灣的發展唯南到北，「府城」是台灣界大的城市，是台灣界鬧熱、界嫷的所在。這是因為台南有特殊的自然環境，閣發展成界有向望、界有特色的人文環境。台南人住的、穿的、食的、用的，攏有真特別的內容，而且台南古蹟上濟，有伊的意義，嘛上界珍貴，所以台南才有「文化古都」的稱呼。母語毋是干礁溝通的工具，閣較是保留祖先的智慧，故鄉的風俗佮文化。台南是台灣文化的起點，荷蘭人佇安平建築熱蘭遮城，隔著台江內海，佮赤崁樓遠遠相對。安平港佮鹿耳門港當時是對外的二大海港。台江內海已經變做平原，台南有閣較多采多姿的發揮。文化古都的自然環境佮人文環境，有傳承、發展的價值佮意義。台南市政就是本土文化的建設，即擺台南教育局極力推動母語教育，特別用台語文來編輯國小的鄉土語言補充教材，其中的「環境篇」，就是佇即個情形下產生的。阮編輯小組，把握府城的地理、歷史的優點，唯近海地理位置的特色，編寫有關自然環境的季節、運河、內海、平原，閣有代表性的植物：鳳凰花、紅樹林、斑芝花、金亀樹佮榕仔。代表性的動物有白鴒鷥、烏面撓片不、厝角鳥等等。若講著台南的古蹟，當然是頂港有名聲，下港上出名，是福爾摩沙的美麗之島。阮編寫全台上早的城堡佮全台第一條商業街的「安平」、府城十景之一的「億載2金城」、全台首學的「孔子廟」、控制台江內海的「赤坎樓」、燕潭荷月的「台南公園」、北園別館的「開元寺」。美食點心，閣較是台南的大目頭，故鄉的滋味，俗閣有局。念起來一大堆：有擔仔麵、棺材枋、虱目魚糜、鱔魚意麵、魚羹、蝦捲、肉粽、蠔仔煎，鹹酸甜。古蹟佮點心，確實是台南觀光發展的大資源。編撰台南的「環境篇」方向足闊、物件誠濟，阮編寫小組佇收集資料、寫作課文的時，攏誠拍拼，除了參考文獻資料的紀錄，利用網站的資料，甚至實地考察、訪問台南的耆老，將收集來的資料做歸納分析，雖是人力有限，總是力求完美。唯台南的自然環境佮人文環境，來引出台南的民俗信仰佮民眾的生活習慣；唯台南人口的口傳俗諺、歌謠、古詩，會當對台南進一步的了解佮體會，證明台南是一個足有歷史文化、足有向望、有發展、有前途的城市。3一、斑芝花春天來到咱的身軀邊斑芝花開甲滿滿是柑仔色的花蕊真大範加添街路的色彩斑芝花啊斑芝花汝的棉絲敢會當拍棉被4二、路邊的金龜樹彼工佮阿爸來到開山路看著路邊的樹生甲真奇怪假那「破病」歸身軀攏生一粒一粒假那「大頭球」仝款「阿爸，這樹仔哪會生做即款模樣？」「戇囡仔，這是龜仔樹生瘤。」「樹仔亦會生瘤？」「樹仔佮人仝款，攏會破病。若有歹物仔入去樹仔的身軀，伊嘛會保護家己，佮歹物仔相拚，後來就變成即款─「生瘤」。」即種樹仔真心適，原來伊就是「金龜樹」。5三、紅樹林藍淑貞紅樹林真正嫷不驚鹹不驚水看守台灣的海墘白翎鷥樹頂車糞箕蟲豸樹跤覕海鳥陪伊唱歌詩紅栱仙仔和尚仔滿滿是花鮡跳舞四界去紅樹林好地理伊是生態的舞池咱愛疼惜愛保持予伊生湠萬萬年6四、故鄉的滋味台灣一個所在有一群人咧議論有人說阮新竹貢丸上好食有人說阮彰化肉圓無底比阮的心裡微微仔笑因為阮知也對阮故鄉來的台南點心鱔魚意麵虱目魚糜白腹魚羹蝦捲蠔仔煎鄉土的情絲伴著點心的芳味對阮來講才是獨一無二阮一生中上愛的故鄉的滋味7五、燕潭荷月─台南公園燕仔飛過咱火車頭來到公園看古錐猴牽藤金龜樹老老老噴水池噴水kong2kong2流湖邊釣魚算我上兒童樂園當做阮兜早時來運動人上濟暗時換月娘顧蓮花紅紅白白是滿四界五彩孔雀講想欲飛圖書館草埔放風吹綠色世界攏是咱的8六、北園別館─開元寺七弦竹栽佇開元寺明朝到今三百外年州仔尾舊址好地理功德堂內有鄭經井菩薩天王共咱保庇北區古廟伊排第一9七、運河的水運河的水恬恬仔流流對台灣海峽運河的水慢慢仔流載著咱的希望流向遠遠的所在迹爾濟年運河的水猶原赫爾仔烏運河的水也是赫爾仔臭你敢知也阮向望是啥乜就是有一工會當看著汝的水變清氣1011民俗篇導言細漢的時，逐擺過年過節，阿娘攏會教咱即陣囡仔做這做彼。一年一年的年節過去囉！囡仔亦慢慢仔大漢，鬥跤手做的代誌嘛愈來愈濟，自然著共阿娘教的代誌攏總學起來矣。細漢過年誠心適。二九暝，序大人會賞紅包，隔日新正穿新衫，佮仝歲的囡仔鬥陣拋拋走。逐擺過節，阿娘會僎無相仝的物件拜門口、敬祖先，教咱「食果子拜樹頭」的道理，就焉爾，逐擺過節時攏會有無相仝的物件通食。一年閣一年，日子過久，過年過節的風俗就焉爾記稠稠。咱的祖先所留落來的風俗習慣，就焉爾一代傳過一代，那親像水流仝款，流傳予囝囝孫孫。即擺，台南市政府教育局編的「鄉土語言補充教材」，有分低年級、中年級佮懸年級。共古早台南府城的「年節民俗」做一系列的整理，予咱的細漢囡仔知也，古早人過年過節有足濟心適佮予人感心的代誌。過年過節的禮俗會當教咱飲水思源，學著做人做事的道理。上界要緊的，是即個道理會當一代一代傳落去。向望即本教材予咱即代的囡仔嘛有心適的童年，大漢了後會當知也感恩佮傳承。指導教授：范勝雄12一、天公伯也的手指簿仔─節氣親愛的小朋友，汝有看過「農民曆」嘸？「農民曆」記的攏是一年內氣候的變化，有寒、熱佮風、雨。較早的做穡人看一本冊，就知也配合天氣的變化來做穡。根據「農民曆」的記載，一年內底有二十四個「節氣」，就是小寒、大寒、立春、雨水、驚蟄、春分、清明、穀雨、立夏、小滿、芒種、夏至、小暑、大暑、立秋、處暑、白露、秋分、寒露、霜降、立冬、小雪、大雪、冬至。一個「節氣」有十五日，這是咱祖先斟酌觀察大自然了後得著的經驗，已經有歸千年的歷史矣。春天時，新曆的三月廿二即日，日佮暝平長叫做「春分」；秋天時，新曆九月廿二即日，日佮暝亦平長叫做「秋分」。六月廿二即日的13日上長、暝上短叫做「夏至」，十二月廿二左右的日上短、暝上長叫做「冬至」。「春分」、「夏至」、「秋分」佮「冬節（冬至）」是農民曆內底四個重要的節氣，拄好共一年分做四份。咱的祖先體會著氣候變化照一定的順序咧循環，對天公伯也遐學著足濟生活的知識。大自然就是一本誠奇巧的天書，節氣就親像是天公伯也予咱的手指簿仔，教咱著順氣候做穡佇土地種作，嘛愛予種作的田園歇睏。14二、府城人的嫁「嫁」是「人生大事」，俗語講「男大當婚、女大當嫁」、「姻緣是五百年前天註定的」。佇農業社會的時代，厝內若有人欲「嫁」，是家族仔的大代誌。若照古早例，嫁對「納采」起頭，紲落來照順序是「問名」、「納吉」、「納徵」、「請期」、「迎親」，攏總有六禮。不過，台南府城人嫁的禮俗是「問名」、「定盟」、「完聘」、「親迎」四項。「完聘」時，查甫頭愛僎「餅」予查某頭，查某頭就「還餅」予「厝邊隔壁」佮「親情五十」。府城人上出名的就是嫁食「大餅」，即款大餅，聽講一個有五斤重；有還著「大餅」，紅包愛包較大包矣。「嫁」是喜事，用的是「好15彩頭」的物、講的嘛是「吉祥」的話。嫁是人生中一層重要的代誌。古早人講「一個某較好三個天公祖」、「勿會娶某散散銀」。嫁了後，一個人的責任會加誠重。16三、食果子拜樹頭—祭祖古早人講「若到年節的時陣，攏會加倍思念著咱的親人」。若無祖先就無咱，佇咱的生活禮俗內底，拜祖先是一項大代誌。過年過節，一定愛會記得請祖先轉來鬥陣過年節。所以過年節佮厝內有喜事的時陣，攏著照舊例祭祖。佇祭祖的時陣，著準備祭品來拜咱的祖先。祭品的意思是摕上好的食物來敬拜，先燒香請祖先，紲落來歸家伙仔做伙食，表示逐家做伙分福氣。遮的祭品亦用諧音佮形狀來表示對未來的向望，比如：拜甜粿「年年高升」，拜丸仔代表「團圓」。祭拜時著燒香，上尾愛燒紙錢、用酒酹錢。「燒紙錢」予祖先做所費，共祖先答謝。相信，祭拜了後的祭品是有祖先的福氣，厝內的囝兒17孫仔，就要逐家做伙食，這就是俗語講的「分福」。佇祭祖當中，「先祭後食」的觀念，是提醒咱尊敬自然佮厝內的序大人，重視合作的重要，不是干礁食食矣爾爾。18四、做十六歲成年禮台南府城有一項別的所在攏無的古禮，就是「做十六歲」。少年囡仔足十六歲的迄年，舊曆七月初七「七娘媽生」即日，後頭厝就會款麻油雞酒、麵線、四果、五牲、六色菜碗、七碗甜芋仔、紅龜粿、兩支歸欉的甘蔗、鳥母衫、七星亭等等的物件，去七娘境的開隆宮共外孫做「十六歲」，感謝七娘媽十外年來的照顧，予囡仔平安大漢轉大人。清朝時，府城有五條港，來往的船隻足濟。照迄陣的規矩，囡仔工干礁會當領半薪，出十六歲的大人才會當領全薪。所以囡仔足十六歲迄年，厝裡的人攏會共伊做十六歲，一方面是共頭家暗示，一方面是慶祝伊會當領大人的工錢。19照古例，做十六歲是阿母後頭厝愛僎的代誌。後頭厝愛共外孫款新的衫仔褲、鞋仔、帽仔、手錶仔、佩鍊、紅龜粿、芎蕉、雞鴨、麵線去拜拜。若是查甫孫著閣佮一台跤踏車，若是查某孫著佮裁縫車仔。牲醴拜了後，序大人佮長輩就用一座七娘媽亭，予十六歲囡仔，淪過七娘媽亭的桌下，查甫囡仔對倒手爿踅三輪、查某囡仔對正手爿踅三輪，出來就算大人矣。轉去厝裡，摕紅龜佮芎蕉去還親戚朋友、厝邊隔壁，予人攏知也即個囡仔已經是大人，愛共伊當做大人來看待。20五、中元普渡舊曆七月是民間攏咧講的「鬼仔月」。農曆七月初一是「開鬼門」，七月三十是「關鬼門」，七月十五是「中元普渡」，家家戶戶會僎真濟物件，請無人祭拜的「好兄弟仔」，共咱台灣人的慈悲心表現出來。普渡有家普、公普、私普佮寄普四款。「家普」是普渡迄日，佇家己的門口拜拜；「私普」是一條街抑是一個莊頭，逐家做伙普渡，先參詳乎好，對七月初一到三十，逐家輪流拜拜；「公普」是廟寺派人去家家戶戶募款，普渡所需要的費用逐家公家出，有人講這就是「題緣金」。佇府城，較無仝款的是「寄普」。清朝同治十年，鹿耳門溪做大水，媽祖廟予大水沖去。21信徒共搶救出來的佛祖漆仔寄囥佇台南的海安宮。逐年舊曆七月十四即日，台南三郊就佇水仙宮做普渡，焉爾叫做「鹿耳門寄普」。22六、全台首學─孔子廟台南的孔子廟是上早設佇台灣的文廟。明朝尾，鄭氏來到台灣，為著欲培養讀冊人，伊的軍師陳永華佇台南設文廟。廟內設學堂，請有學問的讀冊人來教台灣人讀四書五經。同時，佇廟內奉祀孔子公，希望讀冊人攏會當學習孔子公「好學不倦」的精神。民國以後，政府閣共孔子公的生日定做「教師節」。台南孔子廟祭孔為著保存古早例，即碼攏予以成書院負責辦理祭孔典禮。中間有一個足重要的活動，就是用三十六個查甫囡仔跳「六佾舞」。祭孔子時用的三牲，其中的一牲是牛，即隻牛身軀頂的牛毛叫做「智慧毛」。聽講「智慧毛」會予讀冊人較巧、讀冊、考試中狀元。23厝裡若有欲考試的囡仔，序大人攏會佇祭典結束時，欲考試的囡仔去挽迄隻牛的智慧毛，足鬧熱閣足心適矣。24七、貼門聯講好話過年前送神、筅黗了後，紲落來就是「貼春聯」，準備好過年。貼春聯上會當表現新的氣象，過年的時陣，除了佇門口貼門聯以外，閣有足濟所在亦會當貼。窗仔門貼「春」、米缸貼「滿」，雞稠、豬稠、牛稠攏貼「六畜興旺」。「門聯」有「上聯」佮「下聯」，上聯貼佇門的倒手爿（龍爿），下聯貼佇門的正手爿（虎爿）。上聯的尾字是仄聲，下聯的尾字是平聲。門的頂懸嘛有人貼橫聯。門聯的內容真濟種，比如講「天增歲月人增壽，春滿乾坤福滿堂」；做生理的人就會貼「生理興隆通四海，財源廣進達三江」。新年到矣，「貼一個紅」，招一個好彩頭。25八、迎春接福看春牛較早，咱的祖先大部分是靠做穡趁食，就是「看天食飯」的「做穡人」。一年內，氣候若順收成就好，日子就會較好過。就焉爾，逐家攏向望天公伯也疼惜咱，予咱年年「風調雨順」。古早，疼惜百姓的皇帝，攏會佇「立春」進前，行「迎春禮」，拜天公佮神農，為百姓來祈福，向望天公伯也會當賜予逐家一個風調雨順的好年冬。照府城例，逐冬「迎春禮」攏佇「立春」的前一日，佇大東門外的春牛埔舉行。「春牛」是用塗糊出來的水牛。即日，市長做主祭官，府城的大小官員攏愛鬥陣拜芒神春牛。做百姓臼米26的就捾布袋，共迄隻春牛扛去府城街仔頂踅境，百姓攏佇街路兩爿歡迎，誠鬧熱。今仔日的府城，已經誠久無辦「春牛踅境」矣。不過，佇大東門城外，猶閣徛兩隻春牛佇遐，予咱想起較早咧「迎春牛」的鬧熱，順紲共咱提醒「一年之計在於春」。咱著愛佇一年的起頭，好好仔計畫、拍拼，寶惜時間。27俗諺篇導言台灣俗諺自有編輯成冊以來，所收錄的諺語條文內容非常的